പാരിടത്തിന്റെ പ്രതീകം...
കയറുന്നവന്‍
ഈ ഭൂമിയില്‍ വന്നു പിറക്കുന്നവനെ പോലെ...
ഇറങ്ങുന്നവന്‍
മരിച്ചു പിരിയുന്നവനെ പോലെ...
ഇരിപ്പിടം കിട്ടിയവന്‍
അടുത്തുള്ളവനെ പരിഗണിക്കാതെ
നിറഞ്ഞിരിക്കുന്നു...
ചിലര്‍ ഞെക്കി ഞെരുങ്ങി
പകുതി ശരീര ഭാഗം പുറത്തായി
തളര്‍ന്നു പോകുന്നു..
ഇരിക്കാന്‍ കാത്തിരിക്കുന്നവര്‍
ഉപവിഷ്ടവരായവരെക്കാള്‍ എത്രയോ അധികം..
കയ്യുക്കുള്ളവന്‍ കാര്യം നേടുന്നു...
മുന്നിലെത്താന്‍ മത്സരം..
സീറ്റ് സ്വന്തമാക്കാന്‍ വീറും വാശിയും..
വൃദ്ധന്റെ ഊന്നു വടി പിടിച്ചു കൊള്ളാം
എന്ന് പറയുന്ന ഉദാര മനസ്കത...!
സംവരണ സീറ്റിലും സവർണാധിപത്യം പോലെ
പെണ്ണ് പുരുഷന്റെ മഹാമാനസ്കതയില്‍
പ്രതീക്ഷ അര്‍പ്പിക്കേണ്ടി വരുന്നു...!
ലക്ഷ്യമല്ല ഉന്നം....
മിക്കവരും യാത്രയില്‍ അഭിരമിക്കുന്നവര്‍..
ടിക്കറ്റെടുക്കാതെ മന്യരായി
നടിക്കുന്നവരുടെ നീണ്ട നിര...
ബ്രേക്ക്‌ ചവിട്ടാന്‍ മടിക്കുന്ന സാരഥി
ഭൂമിയിലിടം നിഷേധിക്കുന്ന ക്രുരനായ ജന്മി...!
കാത്തു നില്‍കുന്നവര്‍ കയറാന്‍ നേരം
മണിയടിച്ച് ധര്ഷ്ട്യത്തിന്റെ
വേഗം കൂട്ടുന്നവര്‍...
ബസ്‌...പാരിടത്തിന്റെ പ്രതീകം..
